новости веб-чат СЕРДАЛО карта заставка
 







  Общенациональная газета Республики Ингушетия Сердало  


  Общенациональная газета Республики Ингушетия Сердало
 

  2 страница

ОБЩЕНАЦИОНАЛЬНАЯ ГАЗЕТА РЕСПУБЛИКИ ИНГУШЕТИЯ

Выходит с 1 мая 1923 года; № 74 (9595); четверг, 14 июля 2005 года

ГIАЛГIАЙ РЕСПУБЛИКА ЗАКОН

ГIалгIай Республика территоре тIа гулламий, митингий, демонстрацей, шествей, пикетированей хьакъехьа

ТIаийцад ГIалгIай Республика Халкъа Гулламо 30 июне 2005 шера

Статья 1. Юкъара положенеш
1. Ер Закон латт Российски Федераце Конституце 31-ча статьяй, гулламаш, митингаш, демонстрацеш, шествеш, пикетированеш е машарца, герз доацаш гулбалара йола гражданий бокъо ч1оаг1ъеш долча Г1алг1ай Республика Конституце 30-ча статьяй, "Гулламий, митингий, демонстрацей, шествей, пикетированей хьакъехьарча" № 54-ФЗ йолча 2004 шера 19 июнерча Федеральни закона (д1ахо - Федеральни закон), гулламаш, митингаш, демонстрацеш, шествеш, пикетированеш яра йола бокъо 1алашъяра йоаг1ача Российски Федераце кхыча законодательни актай положенеш т1а.

2. Хоржамашта хьалхара агитации, референдума дешаех йола агитации яр духьа гулламаш, митингаш, демонстрацеш, шествеш, пикетированеш елга хоржамийи референдумийи хьакъехьарча Федеральни законо, Российски Федерацеи Г1алг1ай Республикаи законодательства, укх Законо нийсдеш да.

3. Укх Законо гулламаш, митингаш, демонстрацеш, шествеш, пикетированеш яра хьакъехьа Г1алг1ай Республика исполнительни 1аьдала органга, моттигерча самоуправлене органашка хоам бара порядок а оттаю, х1аьта иштта федеральни законодательствага хьежжа Российски Федераце субъекташка леладайта лаьрх1а дола белгалъяь мероприятеш яра кхыдола дешаш нийс а ду.

Статья 2. Керттера кхетамаш

Укх Закона эшаш хиларах леладу ер керттера кхетамаш:

1) публични мероприяти - гуччахьа, машаре, х1аране дакъа лаца йиш йолаш, гуллама, митинга, демонстраце, шестве с пикетироване формаг1а е цу формай тайп-тайпара оаг1онаш чулоацаш еш йола, Российски Федераце гражданий, политически партей, общественни объединеней, дина объединеней инициативаг1а чакхйоаккхаш йола акции, публични мероприятии ярца кхоачашде лерх1ар да наха хетар парг1атта д1акхайкадари нийсдари, х1аьта иштта мехка политически, экономически, социальни, культурни вахара тайп-тайпарча дешаехи арахьарча политика дешаехи доаг1араш дувцийта оттадар;

2) региональни лоарх1амера публични мероприяти - Г1алг1ай Республика паччахьалкхен 1аьдала органий е Российски Федераце паччахьалкхен 1аьдала органий компетенцег1а лаьрх1а долча а Г1алг1ай Республике бахача наьха хьашташта доаг1аш долча а дешаех еш йола публични мероприяти;

3) моттигерча лоарх1амера публични мероприяти - укх статья 2-ча пунктага хьежжа региональни лоарх1амера публични мероприяти йоаца публични мероприяти;

4) гуллам - общественни лоарх1ам бола моллаг1а тайпа дешаш коллективно дувцара цу г1улакха лаьрхх1а къоастаяьча е кийчъяьча моттиге гражданаш цхьана в1ашаг1кхетар;

5) митинг - дукхаг1ча даькъе общественно-политически хьисапе йолча проблемай хьакъехьа обществана хетар публично д1ахайтар духьа белггалча моттиге дуккха нах цхьана в1ашаг1кхетар;

6) демонстраци - д1аболхача хана плакаташ, транспаранташ, гойтара агитаце кхыйола средстваш бе а йоахкаш гражданий группа обществана хетар порядок а йолаш публично д1ахьокхар;

7) шестви - моллаг1ча проблемашта теркам т1аозийтар духьа хьалххаг1е белгалъяьча маршрутаг1а дуккха гражданаш болабалар;

8) пикетировани - плакаташ, транспаранташ е гойтара агитаце кхыйола средстваш бе йоахкаш ца1 е кхы дукхаг1а гражданаш пикет оттаяьча объектана юххе д1а а этта д1а-юха ца а бовлаш оазаш д1аязъеш йола технически средства а йоацаш наха шоашта хетар публично д1ахьокхаш йола форма;

9) публични мероприятеш еш хилара хьакъехьара уведомлени - Российски Федераце законодательстваи укх Законои оттаяьча порядкаг1а Г1алг1ай Республика исполнительни 1аьдала органга е моттигерча самоуправлене органга публични мероприятеш еш хиларах цунца публични мероприяти еш кхерамзлеи правопорядоки йолаш из яра хьакъехьа хоам беш дола документ;

10) публични мероприяти яра регламент - публични мероприяти яра керттерча этапий хана расписани йола (сахьаташ белгалдеш оттаяь план) документ, х1ара этап чакхъяккхара бехктокхаме бола нах белгал а беш;

11) публични мероприяте организатор - Российски Федераце ца1 е массехк гражданин (демонстрацей, шествей, пикетированей организатор - 18 шу даьнна, митингийи гулламийи - 16 шу даьнна Российски Федераце гражданин), публични мероприяти в1ашт1ехьйоаккхилгеи чакхйоаккхилгеи декхар даь шоашта д1ат1аийца политически партеш, кхыйола общественни объединенеш, дина объединенеш, цар отделенеши кхыйола структурни подразделенеши.

Статья 3. Публични мероприяти яра хьакъехьара уведомлени

1. Публични мероприяти яра хьакъехьарча уведомлене т1а (ца1 дакъа лоацаш а волаш еш йола пикетировании гуллами ца лаьрх1ача) хила йоаг1а ер сведенеш:

1) публични мероприяте де лерх1ар;

2) публични мероприяте форма;

3) публични мероприяти ю моттиг (моттигаш), дакъа лоацараш д1аболха маршруташ;

4) публични мероприяти йолалу а чакхйоала а число, ха;

5) публични мероприяте дакъа лоацаш хила тарлуча наьха дукхал;

6) публични мероприяте организатора общественни порядок 1алашъяра,

медицински г1о в1ашт1ехьдаккхара формаши методаши, публични мероприяти еш оазаш д1аязъю технически средстваш лелае лерх1ар;

7) публични мероприяте организатора тайпан ц1и, ший ц1и, даь ц1и, из вахача е волаш йолча моттига хьакъехьара, е организаци йолча моттига хьакъехьара сведенеш, телефона номер;

8) публични мероприяти в1ашт1ехьяккхараи чакхъяккхараи йола распорядительни функцеш кхоачашъяйта публични мероприяте организатора уполномоченни баьча наьха тайпан ц1ераш, шоай ц1ераш, даьй ц1ераш (д1ахо -организатора уполномоченни ваь саг);

9) публични мероприяти яра хьакъехьара уведомлени д1ачуенна дата.

2. Гражданина (гражданашта) еш йола публични мероприяти яра хьакъехьарча уведомленена к1ал кулг язду цу гражданинеи (гражданаша) публични мероприяти в1ашт1ехьяккхараи чакхъяккхараи йола распорядительни функцеш кхоачашъе цо (цар) уполномоченни ваьча сагои, х1аьта политически парте, кхыча общественни объединене, дина объединене, цар отделене е кхыча структурни подразделене публични мероприяти яра хьакъехьарча уведомленена к1ал кулг язду цар кулгалхочо (е кулгалхочун декхараш кхоачашдеча саго) а публични мероприяти в1ашт1ехьяккхараи чакхъяккхараи йола распорядительни функцеш кхоачашъе цо уполномоченни ваьча саго а.

3. Публични мероприяти яра хьакъехьарча уведомлене т1а организатора уполномоченни баь нах белгал а бу цар цунна к1ал кулг а язду, нагахъа санна цу тайпара нах хьожабанза баргбоацаш организатора лаьрх1а моттиг нийслой.

Статья 4. Публични мероприятеш яра хьакъехьара уведомленеш д1ачуэца уполномоченни йола органаши уж д1ачуялара ханаши

1. Федеральни законага хьежжа региональни лоарх1ам бола публични мероприятеш яра хьакъехьара уведомлени (дакъа лоацача цхьанне еш йола пикетировании гуллами ца лаьрх1ача) д1ачулу цун организатора йоазон формаг1а Г1алг1ай Республика Правительстве е цо уполномоченни яьча Г1алг1ай Республика исполнительни 1аьдала органе.

2. Моттигерча лоарх1аме йола публични мероприяти яра хьакъехьара уведомлени д1ачулу цун организатора йоагг1аш йолча муниципальни образоване моттигерча администраце.

3. Публични мероприяти яра хьакъехьара уведомлени д1ачуялара ха (цхьанне дакъа лоацаш еш йола пикетировании гуллами ца лаьрх1ача) хила йиш яц публични мероприяти еш дола ди хьат1акхача 15 денал хьалхеи 10 денал т1ехьеи. Наьха группа пикетировани еш яле публични мероприяти яра хьакъехьа уведомлени д1ачуяла йиш я из еш дола ди хьат1акхача 3 денал т1ехьа ца йоалийташ.

Статья 5. Публични мероприяти яра хьакъехьарча уведомленена регистраци яра порядок

1. Публични мероприяти яра хьакъехьарча уведомленена регистраци ю из д1аийцача дийнахьа (укх Закона 7-ча статья т1а белгалъяь моттигаш ца лаьрх1ача) йоагг1аш йолча органа е моттигерча администраце уполномоченни ваьча г1улакха т1арча саго публични мероприятеш яра хьакъехьарча уведомленей учета лаьрхх1ача книжка т1а (д1ахо - учета книжка). Число, ха, регистраце номер белгалъю организаторга юхеюсача йоагг1аш йолча уведомлене копе т1а.

2. Публични мероприяти яра хьакъехьарча уведомленеца организатора д1атох публични мероприяти яра регламент цу т1а е лаьрх1ача мероприяте х1ара этап яра бехктокхаме бола нах белгал а беш.

3. Уведомлени д1ачулуча хана цунца организатора д1алу укх Закона 3-ча статьяга хьежжа публични мероприяте организатор хилара йола ший бокъо ч1оаг1ъеш дола документаш (физически сага - Российски Федераце гражданина паспорт, политически партена, общественни объединенеи дина объединенеи, цар региональни отделенешта, кхыча структурни позразделенешта - политически парте е общественни объединене ц1ераг1а хьалхавоалача сага бокъонаш ч1оаг1ъеш дола документ, х1аьта иштта политически парте, общественни объединене хьакъехьара йоазув юридически субъектий ца1 йолча паччахьалкхен реестра т1а д1аяздаьлга бакъдеш дола документ). Цу документашка хьож йоагг1аш йолча органа е моттигерча администраце уполномоченни вола г1улакха т1ара саг, х1аьта уведомлени хьачуеннача дийнахьа уж хьачуденнача сага юха а лу. Уведомлени д1ачуийца а д1аязъяь а моттиг нийслой регистраци еча книжка т1а белгало ю публични мероприяте организатор хила цун бокъо хилар ч1оаг1дара хьакъехьа.

Статья 6. Публични мероприяти яра хьакъехьара уведомлени д1аэцеи регистраци еи ца тигар

1. Исполнительни 1аьдала е моттигерча администраце уполномоченни вола г1улакха т1ара саг бокъо йолаш ва публични мероприяти яра хьакъехьара уведомлени хьа ца эца а цунна регистраци ца е а укх тайпара моттигаш нийсъелча:

1) нагахьа санна укх Законо оттаяь еррига сведенеш йоацаш уведомлени яле;

2) нагахьа санна уведомлене т1а организатора а публични мероприяти в1ашт1ехьяккхараи чакхъяккхараи йола распорядительни функцеш кхоачашъяра уполномоченни волча саго а, цу тайпара саг уведомлене т1а белгалваьвале, кулгаш яздаьдеце;

3) нагахьа санна организатора бокъонаш доагг1аш долча документашца ч1оаг1даьдеце;

4) нагахьа санна моттигера е региональни лоарх1амера публични мероприяти яра г1о делга ший компетенцег1а доацача администраце уведомлени яхьийтаяле;

2. Уведомлени д1аэца а цунна регистраци е а ца тигача учета книжка лаьрхх1ача разделе йоазув ду заявитела, йоагг1аш йола уведомлени заявитела хьачуеннача хана, из хьаэца а д1аязъе а ца тигара бахьаний хьакъехьа. Хьаэца а регистраци е а ца тигача уведомлене копи исполнительни 1аьдала е моттигерча администраце йоагг1аш йолча органа делашца юхеюс. Яздаь отказ заявитела д1алу уведомлени д1ачуеннача денна т1ехьарча денал т1ехьа ца доалийташ.

3. Укх статья т1а белгалдаьча бахьанех уведомлени д1аэца а цунна регистраци е а тигадацар аьнна укх Законо белгалъяьча порядкаг1а а хьалашка а юха а уведомлени д1ачуялара духьале хилац.

4. Уведомлени д1а ца эцараи цунна регистраци ца яраи латкъа йиш я организатора лелаш долча федеральни законодательствага хьежжа судебни порядкаг1а.

Статья 7. Публични мероприятеш яра хьалашта барт бар

1. Публични мероприятеш яра хьакъехьара уведомлени хьаийцачеи цунна регистраци яьчеи дийнахьа денз кхо ди далале (х1аьта наьха группа пикетировани яра хьакъехьара уведомлени из ялехьа пхи ди хьалха хьачуялча из хьаийцача дийнахьа) йоагг1аш йола паччахьалкхен орган е моттигера администраци декхарийла я публични мероприяте организаторга публични мероприяти ю моттиги (е) хаи хувцара хьакъехьара хаьдда предложени, х1аьта иштта Федеральни законо д1адехарашцеи укх Законо д1адехарашцеи уведомлене т1а белгалде лерх1араш, формаш, публични мероприяти яра кхыдола хьалаш нийса ца хилар публични мероприяте организатора д1адаьха хилара хьакъехьара предложени а йоазон формаг1а д1акхоачае.

2. Публични мероприяти ю ди хьат1акхачалехьа кхаь денал т1ехьа ца доаккхаш (дакъа лоацача цхьанне еш йола пикетировании гуллами ца лаьрх1ача) публични мероприяте организатор декхарийла ва йоагг1аш йолча паччахьалкхен 1аьдала органга е моттигерча администрацега йоазон формаг1а хоам бе публични мероприяти яра хьакъехьарча уведомлене т1а белгалъяь публични мероприяти яра моттиги (е) хаи хувцара хьакъехьара цун предложени д1ат1аэцара е д1ат1а ца эцара хьакъехьа.

3. Организатора Федеральни законага хьежжа бокъо яц публични мероприяти е, нагахьа санна оттаяьча хана публични мероприяти яра хьакъехьара уведомлени д1ачуянна еце, е нагахьа санна Российски Федераце субъекта исполнительни 1аьдала органца е моттигерча самоуправлене органца бахьанаш белгалдеш еннача предложенехи (е) публични мероприяти яра ханахи барт баь беце.

4. Публични мероприяти е йиш яц, нагахьа санна паччахьалкхен 1аьдала йоагг1аш йолча органо е моттигерча администраце из еш дола ди хьат1акхачале укх Закона 3-ча статьяга хьежжа публични мероприяте организатор хилара публични мероприяти яра хьакъехьара уведомлени хьачуяннача сага духьала долаш х1амаш гучадоале.

5. Укх статья т1а белгалдаьча бахьанег1а публични мероприяти е йиш йоацаш хилара хьакъехьа хьалххе беш бола хоам д1абохьийт организаторга (е публични мероприяте организатор хила бокъо а йоацаш уведомлени хьачуяннача сагага публични мероприяти ю ди хьат1акхачале цхьан денал т1ехьа ца боалийташ.

6. Укх статьяй 3-ча даькъа т1а белгалдаьча х1амаша организатора духьале яц укх Законо д1адехараш нийса кхоачаш а деш мероприяти яра хьакъехьара уведомлени кхыча хана ц1аькха а яхьийта.

Статья 8. Истореи культураи памятникаш лоарх1ача объектий территоре т1а публични мероприятеш яра башхалонаш

Истореи культураи памятникаш лоарх1ача объектай территореш т1а публични мероприятеш яра порядок оттаю Федеральни законагеи укх Законагеи хьежжа цу объектий башхалонаш теркал а еш Г1алг1ай Республика Правительства.

Нормативни бокъон акта т1а белгалъяь хила йиш я, цу тайпара объекташ харцар е йохар кхерам хиларца дувзаденна цар территореш т1а публични мероприятеш е таро йоацаш технически хьал дола, истореи культураи памятникаш лоарх1а объекташ.

Статья 9. Публични мероприяти елга материально-техническии организационнии 1алашдар

Публични мероприяти елга материально-технически 1алашдар кхоачашду цун организатора а цига дакъа лоацараша а шоай средствай чотаг1а, х1аьта иштта из публични мероприяти яра гулъяьча а (е) д1ачуеннача а средствайи боахамеи чотаг1а, федеральни законег1а, нагахьа санна Российски Федераце Правительства актег1еи Г1алг1ай Республика законег1еи кхы тайпа х1ама оттадаь деце.

Статья 10. Ер Закон ч1оаг1денна д1аоттар

Ер Закон ч1оаг1денна д1аотт ер официально кепатехача дийнахьа денз 10 ди даьлча.

Г1алг1ай Республика
Президент М.ЗЯЗИКОВ
г. Магас; 7 июле 2005 шера; № 31-рз


 
----

??????.???????
Новости |  Наш Президент |  Пишет пресса |  Документы |  ЖЗЛ |  История
Абсолютный Слух |  Тесты он-лайн |  Прогноз погоды |  Фотогалерея |  Конкурс
Видеогалерея |  Форум |  Искусство |  Веб-чат
Перепечатка материалов сайта - ТОЛЬКО с разрешения автора или владельца сайта и ТОЛЬКО с активной ссылкой на www.ingush.ru
По вопросам сотрудничества или размещения рекламы обращайтесь web@ingush.ru